政壇：啟剛分享牛津面試竅門
中區扶輪社舊年舉辦嘅首屆香港青年領袖服務獎獎勵計劃，今日將會踏入重要階段，事關三十九名來自十三個制服團體嘅青年領袖，將要通過評審團面試。為咗協助眾青年領袖順利過關，主辦機構日前就邀請咗評審委員之一嘅香港青年聯會主席霍啟剛，分享面試經驗同要訣。
中區扶輪社主席呂劍青（右）同活動籌委會主席黃仰芳（左），邀霍啟剛分享面試經驗。
啟剛話好明白年輕人要經歷面試嘅緊張心情，而佢早年考入牛津大學嘅面試過程，至今仍歷歷在目。佢憶述，當年面試唔容易應付，常有學生垂頭喪氣咁離開面試場地，而佢亦被面試搞到寢食難安。佢話當時被四、五個教授級考官輪流詢問，心理壓力之大真係令人如坐針氈。不過，佢事後發覺一眾教授未必係想要知問題嘅答案，而係藉着面談對答，嚟考驗學生思路及解決問題嘅能力。
佢認為大學面試跟求職面試，其實都係大同小異，好多公司都係透過面試來觀察應徵者嘅言行舉止，繼而評核求職者係咪具有工作熱誠。佢又話要喺面試之中令對方留下良好印象，衣着得體，坐姿端正、自信嘅笑容，一定唔少得喎!
