政壇：星星幫推政改有私心
環境局局長「星星」黃錦星，尋日聯同政務司司長林鄭月娥出席由商界環保協會舉辦嘅環保界別政改諮詢會，雖然會上主要介紹諮詢文件嘅一定係林鄭，但黃錦星都喺活動開始時講咗幾句開場白，話環保同政改都有其獨特嘅歷史原因，所以大家有密不可分嘅關係，但講足幾分鐘都係九唔搭八。
設計圖片及對白
上次闖關全軍覆沒
喺環保界別政改諮詢會，黃錦星試圖努力將環保同政改扯埋一齊，可惜都唔係咁成功。佢話「三堆一爐」有佢既有嘅歷史同規劃原因，好似政制咁有其獨特嘅法律框架同歷史背景，所以所有討論唔可以脫離《基本法》嘅框架。雖然台下聽眾聽足幾分鐘都唔明佢講緊乜，但相信大家都幾佩服佢講得出呢番話嘅勇氣。
自從佢出任環境局局長以來，一直埋首處理三個堆填區擴建問題，但就次次失敗收場。舊年六月底，佢先係喺立法會宣布由於未能取得足夠議員支持，要撤回擴建將軍澳堆填區撥款申請，點知喺一星期後嘅財委會上，泛民同部分建制派聯手通過中止辯論擴建屯門同打鼓嶺兩個堆填區撥款申請，結果三個堆填區擴建計劃全軍覆沒。
到咗今年初，佢決定再將「三堆一爐」嘅撥款申請再次呈交立會審議，上月初仲聯同立會環境事務委員會九名議員遠赴歐洲四國，寓考察於「箍票」。雖然喺建制派支持下，建議喺上星期得到環境事務委員會通過，但建議可唔可以通過到工務小組委員會同財委會都仲係未知之數，所以佢近日去到唔同地方，都積極推銷佢嘅「三堆一爐」，只係估唔到佢連政改都拉得埋一齊講啫！
