可加可減添煩亂 補貼市民最實際

即係咁，舊年港鐵大賺百幾億，今年又可以按可加可減機制加票價百分之三點六，有恃無恐，話就話加幅唔算太大，但年年賺大錢，年年加價，市民唔反感至奇。有學者睇唔過眼，指交通費佔市民收入比例愈來愈大，尤其係低收入人士最受影響，港府作為港鐵大股東，應將其中嘅收益用嚟津貼公共交通服務，補貼市民。

嗱，學者嘅建議唔係冇理由o架，港府早就應該咁做喇。今時今日，百物騰貴，公共交通開支直線上升，基層市民生活負擔百上加斤，可謂苦不堪言。以住天水圍為例，如果到港島返工，一日來回交通費隨時要幾十元，對基層打工仔嚟講，簡直難以承受，唔怪得有人寧願攞綜援都唔肯搵工喇。

其實，除咗港鐵票價超貴，其他交通工具亦唔平得幾多o架。曾經有調查顯示，本港交通費佔低收入市民薪金嘅比例高達一成至四分之一，喺全球最高交通費用城市排行榜名列前茅，問你驚未。香港整體競爭力每況愈下，國際排名不斷下跌，只有交通費一直高企，簡直一枝獨秀，你都咪話唔可悲！

有數可計o架，如果一個家庭月入兩萬元，兩夫婦淨係搭車返工就去咗幾千元，如果有兩個小朋友要返學，交通費更加襟計，加上吃飯穿衣，供書教學等等，隨時斷擔挑都似。

話時話，以上只不過係平均數字咋。部分居住偏遠地區嘅打工仔，交通費比例遠遠高於呢個數。年前有工會調查顯示，超過九成四機場員工認為交通開支太過昂貴，如果計埋每日花兩、三小時上落班嘅車程成本，交通費佔收入嘅比例高達三至四成，直頭等於幫港鐵同巴士公司「打工」，你話點頂吖！

悠悠萬事，民生為大，好多國家及地區嘅公共交通工具，都係由政府補貼，以維持低票價，保障基層市民，北京、多倫多同紐約等城市嘅地鐵服務，更係劃一收費添。人哋做得到，點解坐擁巨額財政盈餘嘅港府做唔到？再講吖，既然本港離島渡輪可以由政府補貼營運，點解其他交通工具唔得？

講到尾，港府唔係做唔到，而係唔肯做啫。咪話太一叮唔提醒吖，如果當局繼續縱容公共交通工具加價，以犧牲基層市民嚟養肥港鐵等交通機構，遲早要付出沉重政治代價o架，叮！