SUN奇古怪：SUN潮語：【食 M】
嚴格嚟講，「食M」並未正式成為潮語，但係絕對係一件被網民熱烈討論嘅潮事。「食M」絕對唔係食「M記」快餐嘅意思。嗰位男子擺落口食嘅「M」，係Mensuration嘅「M」！冇錯！係月經！「食M」即係食月經，嗰位癡心男子為咗表達佢對女朋友嘅愛意，竟然瘋狂到食月經，佢女朋友仲要回應覺得咁樣做係冇問題。「食M」喎？經血喎？都冇問題？可能係我有問題，因為我睇完之後只能講一句港女經常講嘅說話：我真係接受唔到囉。
愛一個人，你可以去到幾盡？呢個問題確實好難答，因為愛係好難去量化，更加係冇量化寛鬆。愛係無解，亦無話值唔值得，愛多愛少大愛小愛，從來都難以計算，就算愛因斯坦翻生都計唔掂數，戀人們嘅瘋狂行為，連霍金都難以解釋。愛到盡，去到盡，可能反過來就係恨。好似前排有個男仔當街畀女朋友掌摑十四巴，呢啲算唔算愛呢？又例如真係搵到個肯陪你捱麥記嘅女人，呢種又夠唔夠愛呢？到底係陳奕迅愛徐濠縈多啲，定係B餐謝安琪BB愛張繼聰多啲？點都唔夠網上最近瘋傳嘅「食M」男嘅愛，對於佢嘅行為，只能講一句：你贏！
「人類總是犯着重複的錯誤」，呢句機動戰士嘅經典對白，正好形容一啲難以理解嘅人同事。「食M」即愛情呢個邏輯，同特首要愛國愛港一樣，都係點都解唔通嘅公式。只能夠講，如果要「食M」先至夠表達愛意嘅話，我寧願孤獨一世食「M」記算。呢個世界，歷史上只有一位仁兄能夠用血去證明自己有幾愛人，佢個名叫耶穌基督。不過聽講話南洋地區，都有人為愛男朋友，而用經血落降頭，呢啲又叫唔叫愛呢？真係信不信由你。
