政壇：搞搞政：追殺絕代雙貪質詢停不了
立法會明日起一連五日召開財務委員會特別會議，今年議員向政府部門提出足足六千八百幾條書面質詢，當中唔少問題都係衝着「貪曾」前特首曾蔭權爵士同「貪湯」前任廉政專員湯顯明呢對「絕代雙貪」而來。雙貪執包袱咁耐，仲要連累部門同事連夜趕工幫佢哋釋除議員疑慮，真係累人累物！
設計圖片
議員何秀蘭就要求公務員事務局交出專職負責檔案管理嘅人手編制、獲准保存同銷毁嘅檔案資料，好似檔案數目、係咪機密文件等，相信係同貪曾任內特首辦懷疑銷毀「貪盡海陸空、歎盡省港澳」連串醜行嘅證據，令外界無法得知佢用公帑買酒同豪華外訪開支記錄有關。更有三個議員要求當局回覆部門公僕三個財政年度嘅酬酢同送禮開支詳情。
不過，亦有議員另有關注，好似公開咗同志身份嘅陳志全（慢必）就相當關心與同志、反性傾向歧視甚至一切同性有關嘅議題。由「性別認同及性傾向小組」人手編制、淫褻物品審裁處評定淫褻案件數量同物品類別等，似乎係議會內嘅「性事」代言人。
