「頭箍小姐」、財經事務及庫務局常任秘書長區璟智今年將退休，佢原來師從著名畫家沈平習畫，仲參加師生展添！區璟智笑言，重新習畫只係短短兩年，平均一個月先上一次堂，四幅參展畫作只屬「高水皮」作品喎！

區璟智同自己嘅畫作合照。

區璟智話，佢早喺三十年前已學習水墨畫，後來因工作關係放低咗，兩年前經同事介紹再拾畫筆，但轉行油畫路線，一切由頭學起。區璟智嘅畫作中，有喺屋企隨手攞起枱布、生果嘅隨意構圖，亦有趁去年遊法國盧瓦爾河畔（Loire Valley）嗰陣留影，返香港慢慢勾畫番當時美景。呢兩幅都成為佢得意之作。

原本有份主理亞太經濟合作組織（APEC）財長會議嘅區璟智話，即使會議泡湯，都仲有幾個任務要完成先走得，包括引入無紙化證券市場制度及成立獨立保險業監管局（保監局）。至於幾時先正式退休歎世界，佢就大賣關子，笑言會跟足公務員制度，「幾時生日就幾時退休」喎！

第一手消息請下載on.cc東網iPhone/iPad/Android/Windows Phone Apps