立法會一班議員尋日參加咗扶康會同中電合辦嘅烹飪比賽，同智障隊員合作齊煮蝦碌，點知個個議員變咗鬥「蝦碌」，煮到出晒煙。今次參賽議員包括劉慧卿、陳克勤、陳恒鑌、莫乃光等。克勤透露，佢喺屋企淨係識煮杯麵，仲話要做「杯麵廚神」，佢認為杯麵太「重口味」，所以第一轉湯要倒咗佢，第二轉先至好食喎！

陳克勤（左）淨係識煮杯麵，相反陳恒鑌（右）就自稱十歲已經煮飯畀全屋企人食嘞。

比賽時，克勤斗膽向卿姐下戰書，話只要唔好煮得衰過卿姐變成「地獄廚神」就得嘞！卿姐聽到之後一笑置之，鬧克勤係「衰仔嚟嘅」，強調自己煮杯麵都係最叻，誓要爭奪「杯麵廚神」呢個稱號。

立法會主席曾鈺成亦有現身為參加者打氣，中電企業發展總裁莊偉茵就趁機會向佢推介踏步發電機，佢貪得意踏咗約一至兩分鐘，已經儲到足夠一部智能手機通話一小時嘅電量，於是靈機一觸，建議擺一部喺立會，等啲議員「拉布」時可以發吓電喎。呢個建議幾好吖，等啲議員嘥公帑之餘，可以幫補吓立法會嘅電費嘛！

第一手消息請下載on.cc東網iPhone/iPad/Android/Windows Phone Apps