政壇：自訂車牌算盤打唔響
○六年推出自訂車牌計劃後，市面多咗好多創意車牌，但八年過去，熱潮似有減褪迹象。立法會議員就財政預算案向部門提質詢，睇埋自訂車牌計劃嘅財經事務及庫務局嘅回覆就顯示，去年自訂車牌嘅平均成交價只係得一萬零五百幾蚊，總成交價更加跌至只得二千二百幾萬元，同前政務司司長唐英年當年推出計劃時估計年收益約有七千萬元差好大截。無官一身輕嘅唐唐會唔會幫政府叫吓賣呢？
設計圖片及對白
收入一年衰過一年
計劃推出初期，曾經吸引好多人絞盡腦汁、打造獨一無二嘅靚牌，示愛牌、公司牌、姓名牌成為一時熱話，唐唐當年宣布呢個計劃時，就以外國為例，話特色、創意嘅車牌可以為城市帶來新意。不過當局明顯高估咗自訂車牌嘅效益，佢哋原本以為每年有七千萬元收入，其中六千萬元可用作扶貧，但咁多年來冇一年達標。
財經事務及庫務局嘅資料顯示，計劃推出翌年，創下年收入四千八百幾萬元高峰後，之後幾年就開始下跌，最低係去年嘅二千二百萬元，反映自訂車牌身價嘅平均拍賣價亦係一年不如一年，○六年每個牌平均價係三萬八千多元，去年只得一萬零五百九十一蚊，政府當年估計係二萬至二萬五千蚊呀！收入少咗，政府惟有年年倒貼幾千萬去扶貧囉。
雖然係咁，依家每年都有超過二千個自訂車牌經拍賣分配，繼「1 L0VE U」早年創出一百四十萬元嘅拍賣高價後，今年就有人打破紀錄，「MM」月前以一百五十二萬元刷新自訂車牌拍賣價新高紀錄，可見別出心裁嘅牌一樣大把人爭。
