專利申請繁複 官僚窒礙創意

前朝政府揚言要發展創意產業，現屆政府亦話要推動本港成為首屈一指嘅知識產權貿易中心，講到天花龍鳳，可惜吹水唔抹嘴，到頭來一事無成。唔使講咁多，淨係專利制度落後就備受詬病，申請程序繁複，費時失事，搞到好多人唔係延遲推出專利產品，就係望而卻步。

唔講唔知，本港專利制度仲係沿用九七年嘅「再註冊」制度。申請人要為產品申請專利，必須先向三個「指定專利局」，包括內地嘅國家知識產權局、英國專利局及歐洲專利局提交專利申請，之後回港「再註冊」。由於關卡重重，一般申請需時四至五年，費用十萬至三十萬元不等，想唔令人卻步都唔得喇。

今時今日，資訊瞬息萬變，產品日新月異，申請一項專利要幾年至搞得掂，等得嚟蚊都瞓，蛇都死喇。香港專利師協會負責人批評得啱，現行制度嘥時間又嘥錢，遲早「拖垮埋本港嘅科技發展」。一位研發防水藍芽耳機嘅設計師就話，「申請專利咁轉折，整得嚟我已經出第二代啦！」無奈之下，有人索性轉到台灣申請專利，起碼手續簡單啲，費用平啲，時間短啲。

其實，依家好多國家已經採用「原授專利」制度，申請人可以直接向本地專利註冊處提交申請，時間慳番一大橛。點知當局一於懶理，知識產權署話喎，當初採用「再註冊」制，係因為「原授專利」成本高，當局已決定採用「再註冊」同「原授專利」兩制並行，最快一六至一七年實施。嗱，呢啲咪就係急驚風遇着慢郎中囉。就算兩年後兩制並行，亦令人質疑成本高、效益低，依然未可樂觀o架。

本來呢，香港融合中西文化，人傑地靈，教育制度完善，基礎設施一流，更有雄厚嘅社會資源同自由嘅創作環境，以往創新力一直領先周邊地區，更享有「東方荷里活」美譽。可惜吖，回歸後優勢逐漸消失，競爭力更不斷下跌，連內地官員都批評香港缺乏創新精神，阻礙自身發展，簡直可悲。

講開又講，香港除咗專利制度落後，營商環境同樣唔掂，官僚保守僵化，手續多、耗時長、成本高，整體競爭力畀新加坡愈拋愈遠。計太一叮話齋，香港淨係識食老本，港產官僚欠缺創意，不思進取，開口埋口重視創意產業，其實只不過係紙上談兵，葉公好龍咋，叮！