遊手好閒嘅絕代雙貪三兩日就見吓面吹水,以免悶死,由於兩條友怕飲咖啡,又怕畀人吐口水,所以就約咗去靜過墳場嘅大球場飲汽水,貪佢私人空間夠遼闊。

「阿湯,如果當初畀我哋捱多兩年,就一齊飛去巴西睇世盃啦,仲使喺度睇香港波!」望住似爛地多過草地嘅大球場,貪曾有感而發。「咪係囉,我以前位高權重,幾多人送飛畀我,如果我仲在位,真係C朗都要巴結我呀!」

貪曾反擊:「送飛有幾閒?我使納稅人錢去巴西住總統套房,你試過未?我曾爵士有飛屎過費爵爺!」貪曾愈講愈high,忽然猛虎射球朝衰樣勁射。「曾爵士?曾雀屎就有你份!就係呢條粉腸佗衰香港足運,我哋一齊省爆佢!」狼狽為奸嘅貪湯以為可以幸免於難,旋即中波餅慘叫:「唔關我事o架!」憤怒嘅球員蓄勢再射:「話明絕代雙貪,點少得你嗰份!」

第一手消息請下載on.cc東網iPhone/iPad/Android/Windows Phone Apps