「香港鐘表業總會」早前假灣仔會展中心舉行周年晚宴暨就職典禮,一班業界才俊聚首一堂,見證瑞士英納格大中華區總裁高鼎國接任主席一職。難得聚首,大家不約而同分享戴腕錶喜好,男士鍾意古董錶、膠帶手錶、八達通錶等,花款多多,而女士們就偏好有閃石的華麗款式,夠搶眼之餘,仲方便襯衫出席活動。同樣於本月選出新一屆會長及理事的香港專業及資深行政人員協會,新任會長盧偉國日前率領一眾核心成員與傳媒見面,順便預告發展大計。

香港鐘表業總會就職典禮
高瞻
香港鐘表業總會永遠名譽會長孫秉樞(左)及顧問梁青華都對鐘錶業前景非常樂觀,仲預期今年中價位錶款銷售額會比貴價錶增長得較快速。

就職
高鼎國(左)接任香港鐘表業總會主席,太太Grace帶住兩個兒子Jamieson、Jefferson,以及爸爸高叔平(右)、媽媽Betty,全家出動捧場。

情傾
百仁基金副主席羅詠詩話買錶最緊要合眼緣,而佢就對閃石設計款式特別傾心,方便襯衫又夠搶眼。

珍藏
香港表廠商會名譽會長莊學海對投資古董錶好有研究,除咗將貴錶存放在瑞士,亦會用木製密封盒擺放本地嘅手錶。

心得
愛沙尼亞共和國駐港名譽領事林建康都係愛錶之人,仲特別鍾意戴膠錶帶嘅手錶,就算落雨或者夏天出汗都唔使怕。

專資會午宴
道賀
黃偉雄(左二)升呢做專資會常務副會長,前會長胡曉明(右)、謝偉銓(右二)及副會長黃友嘉連聲恭賀。

請教
新華旅遊董事總經理楊章桂芝(左)管理經驗豐富,如今當上新一屆理事,理事余秀珠話期待向對方取經。

傳統
專資會理事華慧娜(左)深信着旗袍永不過時,新任會長盧偉國很欣賞。

第一手消息請下載on.cc東網iPhone/iPad/Android/Windows Phone Apps