SUN奇古怪：SUN潮語：【本尊】

台灣反服貿運動、大學生佔領立法院已經不知不覺十幾日。有部分大學生見總統馬英九拒絕回應訴求，更衝擊行政院，並遇到警察鎮壓。有學生被警員打至血流披面，佢哋將呢啲血淋淋嘅相上載上網，一時間血洗facebook！

呢單嘢搞到今時今日，都好似未有解決迹象。有香港花生友話台灣人點都要向中共屈服，因為中共早已用收服香港嘅手法對付台灣。首先，台灣有不少政客，尤其係國民黨嗰啲，係同大陸有生意往來。服貿通過之後，佢哋斷估都可以賺到多少利益，佢哋親共就間接可以令中共影響台灣政局。第二，服貿通過咗之後，大陸就可以用大量金錢，去影響台灣經濟，令台灣更依賴大陸。去到呢個地步，台灣日後自然要仰仗大陸鼻息，就好似香港今時今日咁。到時就算馬英九「本尊」親身到大陸跪求，歷史都唔會返到轉頭。

叫得「本尊」通常都唔係普通人，而係有番咁上下LEVEL，有頭有面嘅人先可稱為「尊」。當然，普通人都可自稱為「本尊」，但別人是否尊你為「尊」，就要有自知之明先會明。

「本尊」呢個潮語其實一啲都唔潮，起碼有上千年歷史。「本尊」本身係藏傳佛教密宗嘅術語，根據維基百科，「本尊」係喺曼荼羅壇城或唐卡嘅佛陀、菩薩或明王像，密宗修行者以佢為禪修對象，而通常修行者一生只會選擇一位本尊來作為修持對象。所以就算用潮語嚟講，叫得「本尊」都應該要有啲法力，而非一般善男信女。

咁點解佛教術語又會潮起上嚟？係因為一啲日本動漫，尤其係東方法術背景嘅作品，都會出現過「本尊」呢個詞，後來網民就開始將佢用嚟形容大人物嘅真身。最近，最後一任香港殖民地總督彭定康「本尊」喺香港出現，登時惹嚟一班「香港人優先」嘅成員夾道歡迎。如果換轉係特區特首「本尊」，又會有咩人招呼佢呢？香港人，你懂的。