全體立法會議員獲邀訪問上海兩日，雖然個團好似為泛民主派議員度身訂造，但泛民議員卻扭扭擰擰，至今都唔肯表態係咪參加，一於吊高嚟賣，甚至借議題出風頭，玩殘一班幫佢哋訂機票同酒店嘅立法會秘書處職員，秘書長陳維安尋日就無奈定下死線，要議員喺下周一之前回覆係咪參加。不過，為咗安撫嗰班唔知自己想點嘅泛民議員，秘書處都可以容許議員喺限期後更改決定，只係價錢可能要貴少少嘞。

設計圖片及對白

做定兩手準備

據悉，秘書處已做定兩手準備，就係事先同航空公司預留八十個機位，就算有議員喺最後一刻先決定隨團，揸住證件都可以即時上機。不過，據聞留位費每人五百元，如果最後唔要個位就等同撻訂，要喺議員外訪開支中扣除。

尋日內務委員會討論上海之行，有啲泛民議員嘅言行就好攞命，好似話咗唔會去嘅新民主同盟范國威，就好緊張傳媒可唔可以全程錄音錄影，同埋議員有冇機會召開記者會。白鴿黨黃碧雲更大彈訪問行程細節內容粗疏，又質疑點解議員要同內地港人聚餐，覺得食飯呢個行程好無聊咁話。乜了解喺上海營商嘅港人生活係無聊咩？一舊雲知唔知自己噏乜？社民連梁國雄（長毛）就指佢忍痛訂機票係要去上海「直斥」一眾中央官員，又問秘書處會唔會為佢安排呢個機會，等佢可以「炳官員一鑊」。

第一手消息請下載on.cc東網iPhone/iPad/Android/Windows Phone Apps