政壇：建制重提廿三條立法
近日唔少建制派人士同一啲內地「護法」都先後提到《基本法》廿三條立法嘅問題，部分更身兼立法會議員添。講到二十三條，據聞幾年前已有鷹派嘅親中人士喺北京建議，將中國《國家安全法》第三章加入《基本法》附件入面，直至香港完成就廿三條立法喎。呢個方法喺技術上的確可行，只係唔知會有咩效果，所以有親中人士就話，如果真係要行到呢一步，倒不如就廿三條立法做諮詢啦！
港府自從○三年提出廿三條立法並遇到社會強烈反對之後，就一直冇提過立法嘅事。有親中人士就透露，只係因為北京認為時機未到，擔心強行立法會適得其反，甚至影響香港國際金融中心地位。
不過，由於激進泛民主派不時會邀請台獨分子來港授課，若香港未來出現如同台灣佔領立法院嘅情況，萬一佔領立法會、政府總部，又或危害國家主權嘅舉動，就一定會觸動到中央嘅神經，屆時可能認為是廿三條立法嘅好時機。
