政壇：丟低蘇州屎區載佳走人

任內工作備受批評嘅屋宇署署長區載佳，尋晚喺一間酒樓舉行榮休晚宴，筵開十七圍，除咗佢家人及署內同事撐場外，是非多多嘅發展局局長陳茂波同常秘周達明都有去餞別。區載佳唔使再面對要求佢落台嘅員工，又唔使理做極唔完嘅僭建，心情梗係靚啦，所以未開席前，佢就唔客氣大展歌喉，帶領一班同事上台合唱《獅子山下》。

丟低咁多蘇州屎離開政府，區載佳（前中）喺退休宴同班同事開心合影。

話時話，區載佳任內曾被踢爆涉嫌僭建，又被申訴專員公署點名批評處理名人僭建有延誤，連署方員工都因為工作量大增而搞罷工，點名要佢落台，佢仲笑得出，下任署長接手後有排搞。所以話呢，做公務員有呢度好，無論做得幾差都好，一夠鐘就可以拍拍屁股走人。