教育局前局長孫明揚(孫公)前年退休後就一直「潛水」,休養生息,少見出席公開活動。尋日孫公罕有現身,到理工大學主持退休後首個公開座談會,題為「量子力學與政治:退休資深公務員的分享」。不過,今次孫公回歸不但再帶大家遊花園,講嘢仲好「禪」,呼籲大家「喺適當時間、以適當方法做適當嘅事」。

孫太透露,孫明揚近來鍾意落鴨脷洲街市買餸,然後交畀佢下廚。

孫公引用量子力學經典實驗「薛定諤的貓」(Schrdinger's cat)作為引子,回顧當年時任政制事務局(現為政制及內地事務局)局長嗰陣,被記者問到對《基本法》附件有關對選舉委員會嘅演繹。由於當時社會未有定論,孫公點答都錯,所以惟有帶記者遊花園。量子力學相信對好多人都談不上熟悉,孫公嘅引言,成功引人太空遨遊喇。

講到最後,孫公都言歸正傳,自言對香港前途好樂觀,認為「條條大路通羅馬」,佢寄語大家知足常樂,「喺適當時間、以適當方法做適當嘅事」。

鍾意耍太極嘅孫公退休後有新嗜好,全程陪坐嘅孫太透露,孫公退休後要定期洗腎,冇得離港旅遊,最多睇吓書、歎吓下午茶,最近仲鍾意落鴨脷洲街市買餸,然後交畀佢下廚添!

第一手消息請下載on.cc東網iPhone/iPad/Android/Windows Phone Apps