港商近年紛自創品牌攻神州,「假髮大王」趙振國、鐘錶界黃業光與珠寶設計師陳曼芝就牽頭組成「香港品牌總商會」,呼籲港商自強,打造「香港好品」。趙振國直言,對開創品牌係「零經驗」,心知燒咗銀紙隨時得個吉,但眼見製造假髮嘅毛利已成「雞肋」,如果公司嘅大腦再唔革新,五年後一定執笠,所以下定決心轉型。已見白髮嘅趙振國出任會長,佢決定重返校園上課,學習打造品牌嘅竅門。

趙振國(左三)臨老學習開創品牌,一眾副會長黃業光(右一)、劉永信(右二)、陳曼芝(右三)、王偉(左二)及秘書長周秉權(左一)齊齊北上拓商機。

梁景就近年自創雙面手錶品牌,殺出一條血路。

用質素谷起品牌

副會長陳曼芝就話,進軍神州有危亦有機,亂打亂撞等同燒銀紙:「雖然好多港商有品牌,但礙於資金有限,宣傳少,與其單打獨鬥,不如團結起嚟向內地商場租舖,傾位置同租金都會易好多。」鐘錶老闆梁景就雖知打響名堂唔容易,但仍堅持去做,近年自創兩面都睇到時間嘅雙面手錶,成功衝出香港。

不過,開創品牌之路荊棘滿途,製衣廠老闆劉佩華慨嘆曾經交過唔少學費:「以往只顧每月狂推出新款式,以為咁就可以谷起品牌,依家明白貴精不貴多嘅道理,精心度一個有代表性嘅設計,顧客先會記得你。」

第一手消息請下載on.cc東網iPhone/iPad/Android/Windows Phone Apps