人民力量主席袁彌明(Erica)熱心政壇發展,最近因為南區區議會海怡西選區補選苦戰三個月,備戰期間,仲曾經同男友隔住房門嗌大交,結果都係落敗,輸咗議席、又傷咗感情,但Erica似乎冇為呢兩個小挫折感傷,反而好快收拾心情,今日就會偕男友飛赴北海道滑雪,享受二人世界補番數。

設計圖片及對白

遊北海道箍煲

睇番今次選舉,Erica可算成績不俗,以逾千票重挫民主黨「老鴿」單仲偕,排名第二,票數贏咗喺政壇耕耘多年嘅老手,而且大家都要搶泛民陣營嘅票,難怪當晚公布結果時,Erica喜極而泣,同男友林雨陽抱頭痛哭,足見選舉中嗌交嘅小風波似乎已成過去。

不過,佢哋兩個除咗因為選舉而嘈交,事件亦牽涉Erica早前接拍咗一部微電影,事關其中一場戲係講述Erica為男主角掃背,仲有親吻鏡頭,結果咪激到男友打爛醋埕嬲爆,所以呢趟北海道之旅,大家要趁機修補雙方關係。

講開補選,東區區議會南豐選區亦因為民主黨原區議員梁淑楨嚴重中風而出現議席空缺,早前放風有意出戰嘅人力繼續大賣關子,聲稱下月會落區宣傳公民提名,到時睇吓街坊反應再作決定喎。據知「劉嗡」劉嘉鴻會落場,唔知「真命天子」係咪就係佢呢?無論如何,有人力嘅地方,班白鴿就頭痕喇。

第一手消息請下載on.cc東網iPhone/iPad/Android/Windows Phone Apps