駕駛人士靠估 運輸官僚靠害

好多人都知道，本港迴旋處有兩線同三線之分，但唔講唔知，一條線之差，安全系數簡直差天共地。嗱，運輸署資料顯示，舊年全港涉及三線迴旋處嘅意外有八十宗，造成一死九重傷。二十一個三線迴旋處中，兩個被列為交通黑點，一個喺荃青路交匯處，另一個位於青衣担杆山交匯處，過去三年兩處共發生七十宗交通意外，造成近百人受傷，你都咪話唔得人驚。

相比之下，全港超過一百二十個兩線迴旋處，冇一個被列為交通黑點。好明顯，三線迴旋處比兩線迴旋處危險得多，簡直係奪命陷阱。正如關注團體指出，三線迴旋處車多路口多，而運輸署嘅道路指引又唔清唔楚，令駕駛人士無所適從，隨時撞板。

講到道路風險，交通警最有發言權嘞。有新界南交通部嘅警官透露，呢兩個被列為交通黑點嘅三線迴旋處各有十個路口，多車切線爭路，部分司機使用迴旋處最右行車線進出，前後要切四次線，險象環生，一個唔小心，隨時中招。

最離譜嘅係，三線迴旋處變成奪命處，政府部門居然闊佬懶理，關人個關。運輸署道路使用者守則淨係教人點樣選用迴旋處左線右線，至於司機身處三線迴旋處究竟應該點樣處理，守則只得一句，「應選用交通最暢順而又方便的行車路線，以駛經及其駛出迴旋處」。

叮！鬼唔知阿媽係女人咩！咁嘅「指引」，講咗等於冇講，就好似「駕車時如發現前方有危險，一定要減速停車」咁，簡直係廢話。呢，本報記者前排喺街頭訪問咗三十名駕駛人士，超過八成受訪者認為三線迴旋處危險，認為運輸署指引唔清嘅更高達九成。連道路安全議會嘅委員都話，喺三線迴旋處應該點樣開車，直到依家仲係矇查查。

三線迴旋處危機處處，指引似有若無，駕駛人士要靠估，直頭係搵命博，你話運輸署係咪靠害吖。有立法會議員批評得啱，運輸署設立三線迴旋處，卻冇制訂清晰嘅使用指引，完全係「漏招」，促請當局快快補鑊，修訂指引，加強宣傳。

正所謂，見微知著。港產官僚渾渾噩噩，得過且過，三線迴旋處設計唔合理，連制訂指引都甩甩漏漏，仲使旨意佢哋做大事？總而言之，官僚靠得住，豬乸會上樹，駕駛人士惟有自求多福，小心為上咯，叮！