SUN搞作：網絡小說：曾雀屎告解
多行不義、貪腐成性嘅曾雀屎，為咗妄想死後可以上天堂，定時都會去教堂告解，冀可消弭罪孽。今日，貪曾又再走入教堂，隔住告解室木板裝模作樣：「神父，我有罪。」神父本着大愛，安慰貪曾道：「世人都有罪，只要誠心認罪悔過，主一定會寬恕你。」
貪曾聞言大驚，即時求救：「神父，唔認罪得唔得？認罪好大鑊，要坐監o架！」神父修養甚高，雖然對住無恥到極嘅貪曾，依然好有耐性：「主呀，請你寬恕呢個唔敢認罪嘅罪人，相信佢有朝一日會蒙得感召，誠心悔過，清洗一身罪孽。」
貪曾苦思神父所言，良久才發問：「神父，如果我犯罪又悔過，悔過再犯罪，然後又悔過，最終可唔可以上天堂？」神父驚訝竟有如此心術不正之人，苦勸道：「敬拜主需要虔誠，希望你重新做人，遠離罪惡。」貪曾討了個沒趣，又見超市試食時間就快到，轉身就撇，臨行忽爾想起一重要問題，惟有邊走邊問：「神父，請問上面有冇凸首呢個位？如果有就發達喇，可以繼續貪……」正所謂神父都有火，貪曾被一腳伸出街，以後都唔敢再告解。
