城中鏡：王石勢成A股打工皇帝
根據內地滬深兩市近千家公司二○一三年年報資料顯示，就行業而言，內地地產業嘅薪酬水平最高，有二百一十九名高層年薪過百萬元（人民幣˙下同），當中王石、郁亮、任志強三位暫時包攬咗A股高層年薪前三甲。相比之下，曾創下高層年薪紀錄嘅金融行業，就繼續黯然失色。
王石稅前年薪達一千五百九十萬元。
雖然舊年受樓市大環境影響，包括地產宏觀調控未有放鬆等，令萬科利潤只係增長兩成，無之前升得咁犀利，不過就差不多公布晒嘅舊年A股年報中，萬科董事會主席王石仍然有望問鼎A股最高薪高層寶座，因為佢舊年稅前年薪再創新高，達到一千五百九十萬元！喺二○一二年，王石就曾以一千五百六十萬元嘅薪酬，登上A股高層薪酬榜榜首。
萬科另一位總裁郁亮舊年薪酬合計為一千四百三十一萬元，唔單止係A股所有上市公司中總裁一職中年薪最高，同時仲超越華遠地產董事長任志強。任志強今年年薪隨住公司淨利潤增長水漲船高，達到近一千一百四十五萬六千元，亦係佢年薪首次過千萬元。
