近日熱爆嘅韓劇《來自星星的你》嘅「都敏俊教授」金秀賢迅速走紅，唔單止佢身價暴漲，仲帶挈埋佢經理人公司Keyeast嘅股價近日急升。喺三月上旬，Keyeast嘅股價就曾試過連續四日上漲，升咗近四成。據《韓聯社》尋日報道，就連香港科網股王騰訊都證實要入股Keyeast，雖然暫未有透露入股金額，但消息刺激之下，Keyeast嘅股價昨收市升百分之六點八三。過去一年呢隻娛樂股已累升一點零五倍，最新市值達二千零九十八億韓圜（約十五億一千萬港元）。

裴勇俊

金秀賢

Keyeast係南韓嘅娛樂傳媒公司，喺早年飾演韓劇《冬季戀歌》嘅師奶偶像裴勇俊持有百分之三十七點五股份，係最大嘅股東。唔講大家可能唔知，原來呢一間公司唔只培訓新人同搞影視製作，仲有投資埋遊戲開發。上年五月，Keyeast就入股咗一間新成立嘅遊戲開發公司，用三億五千萬韓圜（約二百五十二萬港元）買入七成股份。

騰訊呢趟入股Keyeast表面上就係睇中金秀賢嘅人氣，但睇番騰訊最近嘅搞作，似乎就唔係為咗金秀賢咁簡單啦。因為騰訊冇幾耐之前先致公布已經用咗五億美元（約三十九億港元）買入南韓遊戲開發商CJ GAMES嘅百分之二十八股權。出到咁大手筆，家陣又入股Keyeast，擺明想大力發展手機遊戲啦！

第一手消息請下載on.cc東網iPhone/iPad/Android/Windows Phone Apps