台灣學生反服貿熱潮一發不可收拾，部分人連日佔領立法院抗爭，早兩日更加將行動升級突襲行政院，終於釀成流血衝突。台灣同香港嘅政治氣候相若，令人擔心如果香港日後出現類似情況，立法會到時應唔應付到呢？

設計圖片及對白

其實唔少泛民議員嘅助理本身就係社運分子，而佢哋手持立會通行證可隨時隨地暢通無阻地出入立會大樓，當中請得最多社運分子做議員助理嘅就係社民連「長毛」梁國雄，例如黃浩銘早前更加喺立會大樓內玩升降機而被法庭裁定罪名成立，最終只係被判罰款了事；會計界議員梁繼昌亦請咗民陣副召集人王浩賢同社運人士周澄做助理，如果佢哋到時同示威人士連成一線，攻擊力就可以增強數倍。

進出口界議員「象哥」黃定光擔心，如果有一日有示威者唔去佔領中環而改為佔領立會，再加上有「內鬼」接應，立法會將會變成無掩雞籠，到時有幾多保安奮力抗敵都冇用。據聞唔少建制派議員仲口耳相傳，話唔好將太多個人同貴重物品擺喺立會，費事到時臨急臨忙執唔切疏散，被示威者整爛喎！

立會主席曾鈺成尋日出席電台節目時話，台灣學生佔領立法院有好多原因，唔可以單純歸咎於年輕人衝動所致。佢話香港同內地應該引以為戒，立會行政管理委員會下月開會都會討論事件，當中一個重要議題係如果立會被人佔領，仲可以如何運作落去。如果唔盡快制訂應變措施，到時變咗好似台灣行政院副秘書長蕭家淇咁，投訴被示威者食晒佢啲蛋糕同太陽餅就唔好啦！

第一手消息請下載on.cc東網iPhone/iPad/Android/Windows Phone Apps