上任以嚟頻頻孭鑊嘅商務及經濟發展局局長Greg蘇錦樑，近嘅就有香港電台擬建新大樓撥款申請同香港電視發牌風波，阿Greg喺台前萬箭穿心，被責對《廣播條例》「唔熟書」，最後索性唔理添，連民建聯黨友都對佢甚有微言。不過，據知阿Greg喺局內原來有唔少下屬「粉絲」，有人話佢冇「中央集權」係明君嚟，仲好識收買人心添！

蘇錦樑

有官場中人透露，政務官（AO）不時會邀請司局長參加聚會，其中一次就請來阿Greg撐場。不過，成日被人話佢唔熟書嘅佢有備而來，除咗激讚AO同事工作辛勞，仲特別點名大讚自己嘅下屬。上司點名激讚，做細嘅當然勁有面子，頓時生猛番晒。雖然呢番心思好老土，但至少阿Greg肯做，難怪唔少AO同事咁冧佢。

對於有指阿Greg忌才，所以遲遲都揀唔啱副局長同政治助理，但有官場中人透露，唔少下屬覺得佢好肯放手畀同事自由發揮，唔會成個管家咁乜都要理。阿Greg究竟係自知冇料先下放權力吖？定真係咁民主唔行使中央集權呢？真係佢自己先至知喇！

第一手消息請下載on.cc東網iPhone/iPad/Android/Windows Phone Apps