政壇：阿毛阿湯立會互片

公文袋呢個大狀黨向來都係一盤散沙，每個黨員都鍾意各持己見，講得好聽就叫獨立思考，但講得難聽就係冇黨格囉。尋日該黨兩個立會議員「阿毛」毛孟靜同「阿湯」湯家驊就喺會議廳內公開「私片」，真係不堪入目。

立法會資訊科技及廣播事務委員會尋日舉行特別會議，阿毛發言時已亂講嘢，明明通訊事務管理局（通訊局）未開始執法，佢已批評人哋雙重標準。佢狂轟通訊局收「政治柯打」，要進行政治任務打壓港視，講講吓無啦啦又將港視事件拉埋內地維權人士譚作人一齊講。

之後輪到佢嘅黨友阿湯發言，正當大家以為阿湯會硬撐阿毛時，佢第一句就話自己「幫理不幫親」，講明唔會同意黨友阿毛嘅言論，因為唔覺得通訊局係執行政治任務喎！

高佬賢玩字玩出禍

阿毛聽到後即時黑面，點知阿湯仲嫌未夠喉，加多句話一定唔支持阿毛提出嘅動議，搞到阿毛個樣黑過包公，現場氣氛籠罩濃烈嘅火藥味。可能連阿毛都知理虧，惟有粒聲唔出走咗去作無聲抗議。

屬於建制派嘅高佬賢就一連兩日玩諧音，前日話白鴿黨中西區區議員許智峰嘅「峰」字即係瘋癲個「瘋」後，尋日又喺會議上話香港電視網絡主席王維基嘅「基」字，即係電視機個「機」喎！高佬賢除咗被泛民主派支持者鬧爆外，連建制派內部都對佢有微言，質疑佢唔知係咪貪得意亂噏廿四，擔心佢玩出禍！