致癌色素賣通街 病從口入官之過

唔係杞人憂天，本港近年吹起一陣自製七彩小蛋糕熱潮，唔少市民鍾意自行購買材料一試手藝，本來不失為一種生活情趣，可惜當中隱藏危機，自製蛋糕隨時變成自製毒糕，色香味俱全變致癌物俱全，問你怕未。

本報發現，兩款喺歐美等地已經禁用、被視為可致癌嘅食用色素E123及E129，喺本港居然通街賣，尤其喺烘焙用品店及購物網站隨處可見，部分包裝仲無標明含色素種類及食用風險添。正所謂，說話唔可以亂講，嘢更加唔可以亂食，世衞警告，成年人一般每日唔可以攝入超過三毫克E123色素及超過四百二十毫克E129色素，小童嘅上限標準則分別係一點五毫克及二百一十毫克。但係本報將購得嘅E129色膏交學院化驗，發現只要幾滴分量，已有四百二十毫克色素，即係話，食咗呢啲食用色素，隨時中毒。

所以話，現今糕點界流行「整色整水」，其實危機四伏，市民中咗招都唔知吖。有業界人士指出，政府至今無就人工色素提供清晰指引或建議，「我哋都唔係好清楚邊啲食用色素對人有害，以為喺香港入到貨，就無食用安全問題」。

嗱，咁明顯嘅食物安全漏洞唔去堵塞，咪就係港產官僚失職嘅證據囉。佢哋明知歐美地區已經立例禁用有毒色素，居然一直毫無反應，至今中門大開，坐視市民隨時誤墮糖衣陷阱，究竟係腦筋遲鈍，定係麻木不仁呢？致癌色素難以分辨，就算唔禁售，起碼都要求標籤說明，等市民有籤可認吖，家陣完全無王管，毒素有冇超標唔理，商戶有冇出售唔理，食肆有冇使用唔理，食物有冇添加唔理，咁同搵市民嘅生命健康較飛有乜分別吖！

講開又講，當局渾渾噩噩，監管食物安全不力，早就見怪不怪咯。舊年初之嘛，本港爆出致癌食油恐慌，再次暴露當局失職。最恐怖嘅係，港產官僚反應遲鈍，後知後覺，對毒油流入本港固然懵然不知，就算知道之後亦雞手鴨腳亂成一團，最後查嚟查去都查唔到源頭。

時代不斷進步，做人要與時並進，做官更加要識得因時制宜。致癌色素通街賣，港府係咪應該速速補鑊，加強監管呢？好似孔雀石綠、三聚氰胺、塑化劑等等，本來以為冇問題，結果咪又係要立例禁用！