「好靚仔呀！星星好鬼正呀！」腦細房突然傳出陣陣興奮嘅讚嘆聲，唔通淫賤黎都跟風煲泡菜劇？為咗把握大好良機同腦細拉近距離，少膽虫即刻狗衝入去問︰「腦細你睇到第幾集呀？」

點知入到去，就見淫賤黎對住星星局長張相流晒口水，「噏乜呀你？我讚緊局長靚仔咋！」少膽虫當堂O嘴︰「腦細你都幾重口味……」「你識乜呀！星星力排眾議，硬推三堆一爐，都不知幾英明！」少膽虫大惑不解︰「吓？個堆填區喺正壹全霉隔籬，日日要吸臭氣都話英明？」

「好心你睇嘢深入啲喇！」淫賤黎邊抹口水邊講︰「星星話考慮遲吓垃圾徵費實施後，為受三堆一爐影響市民提供減免做補償。我哋日日都要扔幾十萬份《爛果》，到時一定慳唔少啦！」少膽虫聽見，惟有讚句︰「腦細真有遠見！」

第一手消息請下載on.cc東網iPhone/iPad/Android/Windows Phone Apps