政壇：鄭承隆育馬生意一條龍
仁濟醫院前主席Edwin鄭承隆本身做翡翠生意，原來佢仲搞緊育馬生意，打算喺澳洲買牧場培育馬匹，幫馬主由物色靚駒、訓練到退役照料，一切包搞掂。咁咪轉型做馬販？佢笑笑口話：「可以咁講！」身兼新民黨副主席嘅佢唔使幫忙黨務咩？佢哈哈笑咗兩聲，冇正面回答，只強調會繼續做好地區工作喎。
鄭承隆（右）同好友葉俊榮拍住上做一條龍馬販生意。
雖然Edwin做咗多年馬主，但對馬匹有興趣都係最近嘅事，今個馬季更加未錯過任何一個賽馬日。佢發現好多公務繁忙嘅馬主經常隔山買馬，淨係睇住張相就決定買唔買，似足玩神獸卡咁兒戲。所以佢拍住好了解馬匹嘅好友、喺馬會做過十幾年，曾任高級馬房經理嘅葉俊榮大搞一條龍服務，仲打算斥資四千多萬元喺澳洲維省買二百幾公頃農場添！
Edwin話咁做有望降低馬主買馬成本，增加新血加入做馬主，從而提高馬會收入，咁馬會就有更多善款撥作慈善用途，都算係做善事吖。
