政壇：樹根談普選扯上23條
特區政府早前牽頭一連搞咗四次早餐會，首次安排中聯辦法律部官員同立法會議員討論政改，尋日到最後一場，合共五十五名議員出席。呢類早餐會本來係「各自表述、互不引述」，但好多議員為出風頭一於話之你。繼上星期三「政壇印象派大師」郭家麒聲稱特區政府同中聯辦講過「市民唔接受特首方案就冇Plan B」後，尋日就到白鴿黨議員「一舊雲」黃碧雲話有建制派議員喺會上話「冇廿三條，就冇普選」，涉事嘅建仔議員鍾樹根即刻反駁，真係搞到市民頭都亂！
設計圖片及對白
話說一舊雲喺早餐會後話，泛民建制雙方嘅共識仲有好大差距，仲引述有建制派議員，話香港未訂立《基本法》第二十三條，就冇普選，又有議員話一七年普選唔係終點，叫大家啃咗佢。雖然一舊雲發言時冇指明道姓話緊邊個，但大家好快就將矛頭指向樹根。
樹根好坦白承認有講過廿三條，話要中央唔好篩選，但中央都要求國家安全有保障，加上講得係「爆冷」，所有特首候選人都一定有機會選到。佢建議應分兩步落實普選，首先落實高門檻普選，之後廿三條立法，咁就令中央唔使驚，亦冇藉口搞咁多篩選，到時就可達致終極普選。佢重申冇講過「冇廿三條就冇普選」，仲暗寸一舊雲黨友、外號「AV仁」嘅何俊仁，話唔知係咪一舊雲當時睇緊手機分心喎。樹根早上回應完，晏晝仲去到咪兜前，用英文回應問題，睇嚟佢都好緊張有人會錯意。
黎棟國：無計劃立法
政務司司長林鄭月娥同律政司司長袁國強，事後都強調廿三條同政改工作扯唔上任何直接關係，兩者亦冇必然關係，毋須將兩者作過分揣測喎。不過，樹根就唔多認同，認為兩者肯定有關係，雖然唔係條件，但就會互為影響。
保安局局長黎棟國書面回覆議員質詢時，重申特區有憲制責任為廿三條立法，但政府現時嘅工作重點為處理各項民生及社會議題，故暫時未有計劃立法。佢承諾將來立法時，定會充分諮詢社會各界，並確保立法建議符合《基本法》及相關國際人權公約。
