一次意外又致命 工業安全響警鐘

意外發生喺地利根德里，四名工人乘坐香港甚少使用嘅「塔式工作平台」，喺高層外牆進行翻新工程，點知平台突然斷裂，其中兩人及時爬回大廈逃過一劫，其餘一男一女工人逃避不及，隨着工作平台飛墮地面，女工人疑被棚架「生劏」，身首異處慘死，男工人則跌落毗鄰大廈停車場平台不治。工作平台碎片同時擊中地面一名貨車司機手臂，需送院治理。

勞工及福利局局長張建宗事後聲稱，今次係相當嚴重嘅工業意外，局方一定會徹查意外原因，亦會加強巡查云云。嗱，呢啲咪就係賊過興兵囉。業界踢爆，雖然造成工業意外嘅原因好多，但當局監管不力、巡查不足絕對係其中之一。唔少天秤、吊雞、升降台等裝置使用期長達二十年，而當局並無為呢啲機械設定退役期，估計今次意外好可能與金屬疲勞或錯誤計算負重量有關，要求當局立法加強監管。

正如有立法會議員話齋，內地早就為重型機械設立退役期，香港居然落後過內地，唔怪得意外頻生喇。其實，香港負責監管及宣傳工業安全嘅機構唔少，包括勞工處、機電工程署、職業安全健康局，宣傳口號五花八門，「職安為己任，顧己又及人」、「安全做工作，唔使搵命博」等等，原來全部得個噏字咋！

遠嘅唔提，近年工業傷亡人數不斷增加，去年建造業發生二十二宗致命意外，今年頭兩個月已有八宗，從呢啲數字就知道當局有冇做好份工。好似今次出事嘅塔式工作平台咁吖，機電工程署規定平台必須有固定垂直主支架支撐，並由齒輪方式控制平台升降，工人使用時須佩戴降傘式安全帶，但實際上，僱主好多時冇向工人提供合適防護裝備，而工人亦未必有足夠保護知識。講到底，當局對違例僱主判罰太輕，完全冇阻嚇作用，正係工業意外頻生嘅主要原因。

講開又講，除咗工業意外令人不寒而慄，升降機事故同樣令人防不勝防。粉嶺華明邨上星期發生電梯「凶降」十七層事故，雖然冇搞出人命，但居民猶有餘悸，惶恐不安。呢類公屋「跳樓機」事件耐不耐就有一單，你都咪話唔得人驚。咪話太一叮唔提醒吖，慘劇一宗都嫌多，如果港產官僚唔切切實實加強監管，萬一再發生人命事故，你哋吟詩都吟唔甩吖，叮！