城中鏡：論盡收藏喜好 名人錶奇立異
香港鐘表業總會日前舉行董事會就職禮，英納格亞洲總代理高鼎國接任總會主席，獲得好多鐘錶界老行尊到賀。同在場嘅嘉賓傾開，原來佢哋對手錶有獨特喜好同收藏心得。
高鼎國（右）接任鐘表業總會主席，鐘錶界老行尊孫秉樞都嚟恭賀。
太子珠寶鐘錶執董朱繼陶夫婦（左二及左一）同兒子朱國良夫婦（右二及右一）齊出席支持鐘表業總會。
蘇錦樑自稱戴咗八達通錶幾年，原來用來購物多過搭車。
八達通錶。
工業總會主席劉展灝係鐘錶界老行尊，但佢只係擁有約二十隻錶，通常揀款式要合眼緣，唔一定要貴價嘅。講到存放手錶，佢就多數存放喺夾萬，方便得閒攞出嚟抹油同欣賞喎。中南鐘錶創辦人莊靜庵次子莊學海就對古董錶情有獨鍾，佢話會將啲靚錶存放在瑞士，因為當地天氣比較乾燥，但如果擺喺香港，就要用一種木製嘅真空盒裝住喇！
蘇錦樑戴八達通錶
至於商務及經濟發展局局長Greg蘇錦樑，戴錶就講求實用性，見佢手上戴咗隻八達通錶，但佢又唔使乘搭公共交通工具，戴八達通錶做乜嘢呢？佢話係方便買嘢喎，而且隻錶已經戴咗幾年。教育局局長吳克儉就人如其名咁克儉，多年來只係戴過三隻錶，第一隻係佢中學之後爸爸送贈，另一隻係同太太結婚周年時買嘅情侶錶，原本兩隻錶輪流替換，但後來爸爸送嗰隻錶壞咗整唔番，所以半年前就買多一對情侶錶佩戴。
新主席高鼎國對鐘錶業前景非常樂觀，話中價位錶款嘅銷售增長速度會較快，反而高價位錶款上升幅度可能就冇咁明顯。至於佢太太張尹馨同兩個囝囝都有捧場，高太太話唔擔心丈夫做咗主席後少咗時間陪家人，因為老公點都會預留周末陪屋企人喎！
