馬航MH370離奇失蹤逾兩星期後，馬來西亞總理納吉布「正式」宣布「飛機已墜入印度洋，機上無一生還」。在北京麗都酒店等候消息的中國乘客家屬得聞噩耗，行出房間見記者就郁，搵人出氣！喂！關記者乜事啫！又唔係佢哋打落嚟嘅！

馬航呢單嘢，由失蹤至依家，都充滿人性的卑劣！

幾十年來，全球各國爭先發展高科技，又話大氣層外的人造衞星可透過長程望遠鏡，睇到地球任何一條街道行人手上報章頭條的標題字，家陣成條街咁大隻飛機，搵足兩星期，無影無蹤！

有班自詡識字的「文明人」，見大馬巫師手托兩個西瓜，用竹筒望遠方，仲做埋「陸上行舟」，兼好肯肯定的說「飛機唔喺天上，就喺海裏」之後，便嘲笑人家愚昧落後，唉！仲敢當自己係有知識的「文明人」？毫不尊重人哋嘅宗教自由呀！如果佢哋懂用人造衞星去搜索，就唔係「巫師」，而係科學家啦！班巫師晨早講清講楚，話飛機一係喺天，一係落海；你哋文明人知道飛機唔會有油飛足兩星期啦！咁即係落咗海囉！自己蠢，便當人無料到！

還有呀！一大班笑人迷信無知的「評論人」呀！一方面「筆伐」大馬巫師，另一方面卻又支持「打小人」成為「非物質文化遺產」！有啲，仲信嗰啲連羅庚都倒轉用嘅神棍，咁是否好精神分裂呢？

馬航失蹤後，二十六個國家狂派飛機同艦隊去搜救，實則藉故大模廝樣湧入近中國「邊境」，所為何事？你們懂的了！我諗依家南中國海海底唔知多咗幾多個深水雷達呢？大馬總理在未有明確證據前就宣布「飛機失事」，那怎會是航空嘅事吖！此乃政治行為呀！

我只懂用高層次諗嘢！真無計！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps