政壇：搞搞政︰環保教育加把口 阿松謀選特首？

惜食堂係由「小寶慈善基金」出資，而阿松舊年底先出任「小寶慈善基金」嘅名譽主席，所以尋日順理成章出席惜食堂第二間中央廚房開幕典禮。點解阿松無啦啦投身環保事業呢？佢話向來好注重環保，屋企盡量都唔會煮太多餸菜，以免浪費喎。

我哋翻查過佢過往嘅言論，真係唔多覺佢為環保發聲，更加唔好話參與廚餘回收，所以尋日應該係佢將「第一次」獻畀環團。有記者追問佢突然高調搞環保係咪想提高民望，為三年後競選特首鋪路呢？佢就話民望唔係最重要，最緊要係幫到香港市民。雖然呢個答案好得體，但亦令人有無限聯想。

講完廚餘，阿松即刻「自動波」轉話題，自稱近年成日諗吓點幫香港人，最近就思考緊教育問題。例如佢啲小朋友逐漸長大，開始對教育有唔同睇法，唔再好似以前推行教育改革時，一味着重理論，無從實際方面着手。

呢幾句說話可圈可點喎，心水清嘅人實記得阿松未做財爺前，已擔任教育統籌委員會主席，當年負責推行教育改革，最令人印象深刻係佢取消學能測驗，仲批評學能測驗會訓練出「高分低能」學生，惹起教育界反彈。佢事隔十幾年先如夢初醒話自己睇法唔同咗，擺明係想幫自己洗底喇。究竟用意何在，確係路人皆見。