政壇：港搞唔成APEC人財兩失
中央原本安排亞太經濟合作組織（APEC）財政部長會議今年九月中喺香港舉行，香港本來可以趁呢個機會宣傳作為國際都會嘅地位，不過人算不如天算，中央上月底突然以確保會議統籌銜接為由，將財長會議時間延遲舉行，順勢將改到北京舉行。
設計圖片及對白
未見官先打三十大板
政府尋日首次自爆，至今已經使咗五百七十八萬元公帑。未見官先打三十大板，今次仲「人財兩空」，公帑真係使得冤枉喇！被嘲為「守財奴」嘅財爺鬍鬚曾，有冇肉赤呢？
立法會財務委員會去年十二月撥款六千三百四十五萬元支付財長會議費用，又同意開設兩個首長級編外職位以籌備會議，同埋建議開設三十六個非首長級職位。財經事務及庫務局尋日向財委會提交文件，首次自爆喺中央宣布有關決定前，局方轄下嘅會議統籌小組，同埋警方嘅警隊策劃小組已展開前期準備工作，包括視察場地，與中央部委、政府部門同埋相關機構聯繫，準備招標程序，至今花咗五百七十八萬元，當中四百七十八萬元係員工薪酬、六十八萬元係行政開支、三十二萬元係購置辦公室器材。
不過，隨住會議改喺北京舉行，財委會已撥款嘅六千三百多萬元會全數保留喺庫房，並會撤銷兩個首長級編外職位。至於之前提及嘅兩個小組亦會喺明日解散。
咁籌組會議嘅公務員有乜安排呢？文件提及本來要調去幫手嘅公務員，依家又要重新調配，有人笑言呢單嘢真係搞到佢哋氹氹轉喎。值得一提仲有旅遊業同零售業界，本來可以受惠於訪港高官等一眾高端旅客，點知依家見財化水，真係喊都無謂喇！
