政治亂象無休止 內鬥內耗到何時

呢嗱，香港七國咁亂，令人忍無可忍，連前高官都睇唔過眼，指近年示威轉趨暴力，影響營商環境，本港競爭力正逐漸下降。佢警告香港唔能夠各走極端，否則要賠上社會穩定同經濟受損嘅代價。

係人都知，動亂絕非香港之福，道理就好似阿媽係女人一樣咁簡單。問題係，有啲人懷有不可告人嘅政治目的，唯恐天下不亂，你苦口婆心叫佢哋唔好各走極端，唔好搞搞震喎，根本就係與虎謀皮。

講起真係可悲，回歸前香港繁榮昌盛，歌舞昇平，人人安居樂業，係名副其實嘅福地；可惜回歸後不斷沉淪，好景不再，福地已經變成亂地。香港亂過亂世佳人，無論係有識之士，定係普羅市民，都深有體會，而且身受其害添。

正所謂，自作孽，不可活。香港搞成咁，除咗港府無能，施政混亂，社會愈來愈政治化絕對係主要原因之一。家陣就算雞毛蒜皮嘅小事，都會同政治扯上關係，政客為反對而反對，無所不用其極，導致爭拗無日無之。尤其有啲人熱衷於搞街頭抗爭，無視法紀，肆意妄為，手法愈來愈激，香港唔亂至奇喇。

就講政改爭拗吖，反對派開天索價，揚言如果傾唔埋欄就要佔領中環，癱瘓金融中心。而中央為求息事寧人，向反對派伸出橄欖枝，邀請全體立法會議員訪問上海，點知反對派議員一係唔領情，一係扭扭擰擰。其實，就算全體議員訪問上海又點吖，咪又係各懷鬼胎，雞同鴨講，盞嘥氣嘅咋！

呢，近日台灣學生攻佔立法院，本港反對派零舍興奮，有人揚言如果港府提出嘅特首普選方案「不符國際標準」，除咗佔中，唔排除佔領立法會。亦即係話，反對派計劃有樣學樣，一於搞大佢，問你怕未。

天要下雨，娘要嫁人，有人一心想攪亂香港，阻都阻唔到。計太一叮話齋，禍福無門惟自招，香港係繼續自殘，定係自救，其實就喺港人一念之間咋，如果有人想香港沉淪，咁就神仙都難救咯，叮！