潮語「爆房」好似好火爆，但唔好以為同恐怖活動或罪案有關。「爆房」嘅意思其實就係去純粹租房，多數係指情侶間情到濃時，雙方屋企又唔太方便嘅時候，搵間酒店房短聚溫存一下，即係上一代所謂嘅「開房」。

最近台灣有年輕大學生衝入立法院，將警察趕出議事廳門外，並通宵留守「佔領」台灣立法機關。佢哋目的就係希望阻止立法院，同大陸簽訂同香港CEPA差不多嘅「服貿協議」。國民黨馬英九政府，喺未得到社會共識同民意反對下，想學香港咁強行闖關，闖禍係必然嘅。因為台灣立法院好歹都係全部民選，加上台灣實行真正民主政治接近20年，公民社會成熟，低民望嘅馬英九要好似香港啲人咁玩霸王硬上弓，真係隨時墮馬都有之。

呢個「服貿協議」擺到明就係中共對台灣嘅經濟侵略兼統戰手段，實行咗之後估計大陸嘅人同錢都會大量到位，大陸嘅錢、平嘢、毒嘢同大陸人嗰套具「中國特色」嘅文化，勢必影響台灣人民生活。台灣大財團生意佬可能會因為咁而賺多咗錢，刺激到台灣疲弱嘅經濟，但有香港呢個辦畀台灣人睇，食咗中共呢劑藥之後，會令社會普羅大眾付上沉重嘅代價。所以，台灣本土新生代挺身而出，「爆」入立法院企硬做嘢。如果今日唔爆，明日就會好似香港咁，連「爆房」都無得爆！

「爆房」嘅「房」可以係時租酒店，即係類似喺九龍塘嗰啲，基層一啲就係旺角油麻地嘅賓館同「別墅」。但今時今日，年輕港女又點會同你爆呢啲？最低限度，都要爆酒店房先有偈傾，之後搞乜？有無得搞？就要睇自己。

自從○三年個人遊實施之後，每年有大量大陸旅客訪港，有啲時租酒店索性改裝做個人遊生意，令到依家香港嘅情侶想搵個地方「爆房」，啲房都「爆」到七彩，好多情侶搵咗成晚，都搵唔到間房嚟「爆」，咁嘅情形真係唔止嬲到爆，仲肯肯定谷到「爆」!

第一手消息請下載on.cc東網iPhone/iPad/Android/Windows Phone Apps