政壇：搞搞政：袋巾孖郭榮鏗做嘥紙王
環保人人愛，立法會秘書處實行「無紙化」好一段時間，但至今仍有唔少立法會議員要求秘書處將啲會議文件逐份影印畀佢哋，部分議員連自己無加入嘅委員會，都要求印晒中、英文嘅文件，其中更有將「環保」兩隻字掛喺口邊嘅公文袋議員，如梁家傑（袋巾傑）同郭榮鏗就攞大量會議嘅中英文文件影印本。減少用紙係環保第一步，好似佢哋咁樣，樹都要喊喇。
設計圖片及對白
秘書處近日發信畀議員，再次提醒佢哋立法會早已將所有會議文件以電子方式發放，議員透過電郵或直接上網就可以睇晒，如無必要就唔好印出嚟。秘書處仲附上現時全體七十位議員索取文件嘅情況，根據該份紀錄，除公文袋兩名議員外，民建聯嘅葛珮帆（EQ）同何俊賢（高佬賢）、工程界嘅盧偉國，以及自由黨嘅鍾國斌（Felix）等都係索取文件影印本較多嘅議員。
我哋逐個議員問番點解要索取咁多文件影印本，袋巾傑就解釋，使用影印本係貪方便喺文件上做標記同傳閱，有啲文件雖然唔係自己所屬嘅委員會，但亦值得關注，所以都攞嚟睇吓。經本報查詢後，佢已經吩咐同事，以後唔係佢所屬委員會嘅文件只索取電子版。Felix就自認冇影印本唔得，為免成日都唔記得檢查電郵，影印一份份咁喺枱面先最穩陣，包唔會睇漏。佢仲話，早前秘書處通知議員六月份可以去英國參加研習，就係因為冇影印出嚟畀佢，搞到自己睇漏咗錯過截止期限。
