政壇：坐車靠人推周一鑊出醜
小心路面安全！因危險駕駛獲罪嘅行政會議成員林健鋒，尋日同不小心駕駛嘅發展局局長陳茂波同場出席一個活動，雖然與車無關，但兩個需要改進駕駛技巧嘅難兄難弟碰面，就連放禮炮嘅技術都一樣麻麻，人哋拉響禮炮，佢哋都擰嚟擰去鬥尷尬。另一邊廂，人稱「周一鑊」嘅平等機會委員會主席周一嶽就示範危險駕駛添，佢尋日參加香港復康聯盟舉辦「共融單車同樂日」，笨手笨腳試踩殘疾人士手動單車，真係好險呀。
周一嶽（白衣者）笨手笨腳，要幾個人圍住扶佢。
周一鑊參加嘅活動係畀殘疾及健全人士一齊踩單車擴闊社交，佢到場做騷，點知佢葫蘆身形，要幾個人圍住扶佢坐上手動單車，然後繞住城門河踩約兩公里。周一鑊一開波就喘晒氣，大會主席惟有派義工跟實佢，上落斜都要幫手。去到中段路程，周一鑊開心到忘晒形，以為自己已經適應，好得戚話：「依家好似易郁咗，比開始嗰陣鬆咗。」但回頭望先發現其實係義工一路好似推輪椅咁推住佢，真係醜死人。事後周一鑊死撐話，自己有游開水同打壁球，只係唔慣用前臂出力，又嫌架手動單車唔夠潤滑油，亦唔及新型號嘅同款單車，總之賴得就賴。
