政界廣傳前財政司司長梁錦松（阿松）有意競逐下屆特首，早前阿松聲稱自己「唔信」、甚至要問過老婆伏明霞等，尋日卻疑似改口，面對參選與否嘅提問，佢只係不斷重複話每一位市民都應該齊心，喺唔同崗位服務社會，又叫大家唔好被呢類議題拉開政改討論，但係無再否定參選。

但尋日佢獲邀以金融專家身份、喺基本法推廣督導委員會舉辦嘅研討會上致詞，更似係闡述競選與治港理念，獲安排坐喺講台正中間嘅阿松演詞廣泛，既意有所指咁呼籲政治人物要識得「退一步海闊天空」；又大讚內地對香港照顧有加，其中CEPA同個人遊當年正係由佢負責；又警告照搬西方普選制度，會令香港變成福利主義，當權者只懂減稅同增加政府開支，好易變到部分歐洲國家咁債台高築，令人覺得佢係數緊自己當年大力削支出滅赤嘅政績，多過講解香港實行普選嘅好處。一向管選舉開支好嚴嘅選舉事務處，係咪要做嘢呢？

第一手消息請下載on.cc東網iPhone/iPad/Android/Windows Phone Apps