政壇：廖氏兄弟為陳家珮助選
南區區議會海怡西區補選今日投票，填補因為前民主黨中委馮煒光辭職做官而懸空嘅議席。其中一名候選人新民黨嘅陳家珮，尋日朝早就搵咗「廖氏兄弟」行政會議成員廖長城、立法會議員廖長江，再加埋身兼行會成員同立會議員嘅新民黨主席葉劉淑儀，一齊出席造勢大會幫佢拉票。
廖長城（前右三）同廖長江（前左二）兩兄弟尋日一齊落咗海怡半島，為陳家珮（前左三）造勢助選。
廖長江雖然並非海怡西區嘅居民，佢盛讚陳家珮熟悉該區發展，會更明白居民嘅需要，至於廖長城就讚陳家珮年輕有活力，做事實幹，而且喺外國接受教育同做過嘢，具備國際視野，依家肯回流香港服務社會，實在好難得。同場仲有多名剛新入黨嘅公民力量成員，包括做咗新民黨副主席嘅沙田區議員潘國山。
海怡西補選另外兩名候選人為民主黨單仲偕同人民力量袁彌明。
