末代港督彭定康以英國牛津大學校監身份訪港五日,原本講明不談政改唔會搞搞震,但實際上就不斷會見在港嘅港英餘孽密密斟。繼早前被本報踢爆,接連與「民主阿婆」前政務司司長陳方安生同鄧永鏘爵士密會後,尋日佢出席牛津大學香港畢業生會活動時,又同前布政司鍾逸傑爵士密斟,事後鍾爵士直言同肥彭傾得好開心。肥彭咁鍾意同啲爵士會面,唔知佢臨走前會否見埋「貪曾」前特首曾蔭權爵士呢?

肥彭(中)尋日出席牛津大學香港畢業生會嘅活動。

陳太前日喺電台節目中,「此地無銀三百両」咁話無同肥彭傾過政改問題。肥彭尋日亦夾晒口供咁話,真係無同陳太傾過政改,亦無討論「佔領中環」行動,又聲稱對陳太提出嘅普選特首方案無意見喎,真係搵鬼信。肥彭淨係肯承認,同陳太講過會喺今年十月舉行嘅牛津大學展覽中,展出陳太先母、國畫大師方召麐嘅畫作。問佢點解要同陳太等人食飯會面,肥彭強調自己喺香港仲有好多朋友,陳太更加係佢其中一位最要好嘅朋友,講得認真癡纏。

第一手消息請下載on.cc東網iPhone/iPad/Android/Windows Phone Apps