政壇：張仁良呻教院改革難

張仁良尋日擔任香港校董學會第一屆理事就職禮嘉賓，並就「校董——推動變革的夥伴」題目作演講，佢話校董會等同上市公司，而校董就等於一位倡導者、變革者、導師、嚮導同企業家，唔單止身處管理層，又要成為校長同教育工作者嘅榜樣等，仲係社會道德典範，真係讚到大家天上有地下無。場內有來自唔同學校嘅校董，張校長講講吓，都扯到教院嘅工作。

林煥光和應路難行

佢話，教院喺農曆新年期間發出咗二千多份問卷，調查吓各學校將來計劃聘請邊種類型嘅教師，依家已經收番一千多份問卷，未來幾日就會完成分析，然後佢哋就會針對教師培訓課程進行改革，目的係為各學校提供最適合嘅老師。所以，佢勉勵大家唔應該怕接觸新事物。

佢呢邊講學校改革，同場嘉賓、曾任教育署署長嘅行政會議召集人林煥光都和應改革難，尤其喺公營機構，一般人都認為佢哋較保守。林煥光話，如果要推動良好機構管治，就應該畀更多來自唔同專業、界別嘅人加入，因為大家腦震盪時意見都多啲喎。