歷史古蹟變樂園 皆因保安無王管
法定古蹟係珍貴歷史遺產，置身其中有如穿越時空，可以發思古之幽情，確係賞心樂事。不過咁，如果有人將古蹟當作私人樂園，狂煲電話粥、打機、刨馬經，甚至曬柚皮，咁就唔止大殺風景，簡直烏煙瘴氣。邊個咁冇公德心？咪就係古物古蹟辦事處聘用嘅保安員囉。
現時全港共有一百零五個法定古蹟，當中唔少都有保安員駐守。叫得做保安員，理論上梗係要時刻緊守崗位，盡忠職守喇，可惜事實並唔係咁樣。本報記者早前巡查元朗、九龍城及油尖旺等多個古蹟，發現唔少保安員擅離職守，蛇王偷懶，無奇不有。有人匿喺雜物房打機，全程當遊客透明；有人狂煲電話粥，見到遊客犯規都唔阻止；有人索性行出更亭去公園「觀光」，半個鐘頭都唔返回崗位；有人甚至一心一意刨馬經添。
你話嘞，古蹟辦究竟點樣監管o架？任得保安員偷雞躲懶，萬一古蹟被人破壞，邊個負責呀？係人都知，當局保育政策乏善足陳，諗唔到連日常保安工作都馬虎成咁，問你服未。老實講，如果古蹟唔珍貴，都唔使花錢請人駐守喇，家陣有保安員等於無保安員，古蹟變咗無掩雞籠，簡直豈有此理。
再講吖，就算古蹟冇受到破壞，保安員偷懶怠職本身已經浪費公帑喇。古蹟辦每年花費二百六十萬元請保安員，喺二十八個對外開放嘅法定古蹟及歷史建築物提供保安服務。錢就使咗嘞，可惜古蹟冇受到保護不特止，仲被保安員搞到烏煙瘴氣，簡直弄巧反拙。正如立法會議員話齋，保安員擅離職守，唔單止有違保安原意，亦造成公帑浪費，古蹟辦必須向管理公司反映，絕對唔可以連監管責任都外判埋！
冇錯嘞，古蹟保安員蛇王成風，最根本嘅問題咪就係古蹟辦大食懶囉，官僚敷衍塞責，根本冇負起監管責任。講起上嚟，蛇王保安員隨時係學古蹟辦官僚嘅咋，你知啦，古蹟辦話就話負責古蹟保育工作，不過經常懶懶閒，唔嗲唔吊，搞到好多珍貴古蹟面臨厄運。計太一叮話齋，古蹟辦如果真係想保護文物，除咗履行監管責任，督促保安員緊守崗位，更加要做好自己份工，唔好得過且過吖。
講開又講，港府口口聲聲要保護文物，可惜純粹大隻講，正因為當局闊佬懶理，搞到唔少古蹟受到摧殘，唔係被拆卸，就係被改到變晒樣，有近八十年歷史嘅景賢里幾乎不保，咪就係最佳例子囉。家陣連監管保安員咁小嘅事都做唔好，證明當局根本係「假保育」啦，叮！
