SUN奇古怪：SUN潮語：【入血】

血，係咪濃於水？就要視乎兩個人是否有親。不過喺醫學角度睇，基於一個人嘅血型係遺傳，一半嚟自阿媽一半嚟自阿爸，如父母血型唔同，就算有親都有機會因為血型問題互相排斥。不過唔知中國人係咪缺乏醫學常識，定係特別嗜血，硬係鍾意講啲咩血濃於水，尤其係當國家遇到「重大災害」嘅時候，啲中國人同「中國香港」人就會搬出呢句血濃於水出嚟度水救災。查實一個文明社會，基於人道立場，係咪血濃於水，都應該會出一分力幫助有需要嘅人。就算係巴基斯坦、哈薩克、非洲津巴布韋、 瓦努阿圖…出咗事要世界人民伸出援手，可以的話都應該予以援助。馬來西亞唔見咗飛機，全世界都幫手搵，唔通澳洲人美國人又同你馬拉人中國人血濃於水？以人為本、尊重生命，呢啲就係西方文明嘅價值，關血咩事？只不過好多人民族主義「入血」，愛國愛到「入血」。搞到成日「血濃於水」吧！

出血、輸血、換血大家聽得多，咁「入血」又點解釋？當然細菌同病毒可以入血，仲會好大鑊，甚至會死得人。但原來除咗啲病菌會「入血」之外，好多嘢都會「入血」!

例如睇《來自星星的你》睇到「入血」嘅人，就會日日以為自己係全智賢，要求自己男朋友好似男主角咁用超能力服侍佢。此外，一啲思想、行為或性格都可以「入血」，仲係入晒嗰隻，例如爛賭到「入血」，又或者有啲愛國愛港到「入血」嘅人士，好似鄭耀棠咁，話如果港人繼續向自由行旅客示威，中央可以對香港發出旅遊警示，呢類言行就同病菌「入血」一樣，有病。

其實凡事都係適可而止比較好，吓吓搞到「入血」係會影響身體。好似有啲人失戀失到「入血」，係會導致自暴自棄，甚至自殘自殺，咁就真係無謂。