政壇：訪滬行白鴿變鵪鶉
特區政府成功爭取全體立法會議員到上海交流，但一眾泛民主派議員就扭扭擰擰，圍埋密密斟不特止，仲要開出刁鑽嘅條件吊高嚟賣。之不過，作為泛民龍頭大黨嘅白鴿黨更加為咗區區一趟上海之行搞到失晒方向。
設計圖片及對白
要睇公文袋動向決定
泛民上海之行屢開條件，一時話行程要包括討論政改，一時又話要負責政改嘅京官單獨見佢哋。不過，今次北京似乎好順攤，盡量滿足佢哋要求。講到咁，泛民黨派都冇乜藉口話唔去，但白鴿黨就依然騰騰震唔知點算好，佢哋前晚仲開中委會討論上海之行。不過，黨主席劉慧卿會後就落咗封嘴令，話內容不得外洩。原來一眾白鴿因為入過中聯辦被狙擊後已變成驚弓之鳥，今次去上海，佢哋都左度右度，就連派重量級老鴿去都擔心被人話佢哋咁隆重其事，唔知博乜喎。
有鑑於此，白鴿黨就決定睇吓已經同佢哋一樣咁高咁大嘅公文袋派乜嘢人去先決定。由於卿姐已表明唔出席，所以如果公文袋係派黨魁梁家傑或湯家驊去， 佢哋就由「AV仁」何俊仁同涂謹申上陣，如果對方只係派啲二打六去，佢哋就由得議會新丁胡志偉、黃碧雲去應付就算數。連派邊個上陣都要睇其他黨點做先再決定，正一白鴿變鵪鶉，認真羞家。
另外，早前中西區區議會傾推廣《基本法》嘅二十五萬元撥款，期間有乳鴿想搞事，但最後都不了了之。到葵青區議會尋日傾相關撥款，雖然該小組由乳鴿林立志坐鎮，但最後都係無風無浪一致通過撥款。無他嘅，連班老鴿都被牽住鼻子走，班乳鴿又做得啲乜嘢出樣吖？咪一齊做鵪鶉囉！
