Google總部有貴客到，呢位貴客就係少林寺方丈釋永信。釋永信去到Google弘揚佛法，同場仲有加勒比海盜，有在場者不禁講句「嗰一刻，有種『穿越』嘅感覺」，究竟當中發生乜事？

釋永信到訪Google總部，向百多名工程師弘法同介紹少林文化。（資料圖片）

話說少林寺方丈釋永信去到美國加州硅谷Mountain View嘅Google總部弘法，仲帶埋一班少林僧人去。釋永信對住百多位Google工程師演說咗半個鐘，主要介紹少林文化。釋永信仲話Google對互聯網資訊自由嘅貢獻，與佛法中「眾生平等」理念相同。

釋永信用中文演說，班美國工程師靠聽傳譯員即時傳譯，釋永信既然係嚟弘法，自會提到唔少佛法用詞，好似「大千世界」之類，你話用英文點表達？只見嗰位女傳譯員譯到滴晒汗，台下有唔少中國工程師就聽到拍爛手掌，不過，爆笑亦唔少。班美國工程師聽完釋永信演講，有人仲即場話好想去少林寺短期修行。

呢個場合，點少得少林武僧，六位着灰袈裟嘅武僧台上表演少林武術，而配樂竟然係電影《魔盜王》隻經典歌曲《He's a pirate（他是一個海盜）》！果然好「穿越」吓。咁特別嘅場面，班工程師即場攞手機狂影，selfie就唔少得啦！

第一手消息請下載on.cc東網iPhone/iPad/Android/Windows Phone Apps