城中鏡：肥彭民主阿婆謀反?
正在訪港嘅末代港督彭定康（肥彭）尋日同「民主阿婆」前政務司司長陳方安生兩個港英餘孽約埋「搞搞震」！話說肥彭尋日展開第二日訪港行程，下午約四時四十五分以牛津大學校監身份到中環嘅海事博物館，出席牛津大學珍藏展品特別展覽開幕禮，佢除咗反口就香港普選等多項議題「說三道四」外，夜晚又約咗前下屬民主阿婆，到灣仔一間中菜館撐枱腳，莫非民主阿婆向肥彭匯報香港嘅政治情況？抑或係密謀攪局呢？
彭定康夫婦（圖）和陳方安生於灣仔一間中菜廳密會兩個多小時後離開。
陳方安生在彭定康離開後約十分鐘，獨自步出中菜廳，非常鬼祟。
彭定康晚上離開海事博物館時拒絕再接受訪問，期間一度面容扭曲。
有市民帶同多款中英對照標語，迎接彭定康出席活動。
有市民趁混亂期間向彭定康送上其愛吃的蛋撻，由彭定康太太代為接收。
話說肥彭抵達海事博物館時，包括「香港人優先」在內嘅數十名市民手持港英旗、龍獅旗到場「贈興」，肥彭一見到港英旗就「未開腔，先興奮」，時光倒流當正自己仲係港督，一方面親自接請願信，又忘記自己前日講過話唔會評論香港政改嘅言論，忍唔住就香港普選等多項議題「說三道四」，所以話佢「姣婆守唔到寡」就係咁解嘞！
肥彭遇「突襲」 面容扭曲
肥彭開腔先後回應《明報》前總編輯劉進圖遇襲案，話案件令各界震驚，又評論港大民調被質疑公正性一事，指香港嘅大專院校享有學術自由，強調政治問題不應干預學術調查，港大應繼續相關研究。當問及對香港政改睇法時，肥彭話喺《基本法》框架下，相信香港政改方案會達到共識，之後再被追問時又煞有介事話，唔希望外界將佢當成香港事務嘅「球證」，聲稱佢對《基本法》、「一國兩制」、「港人治港」、民主自由嘅個人看法不會改變。
尋日展覽開幕禮以閉門形式進行，直到臨近晚上八時，肥彭準備乘車離開海事博物館時，約有卅人趨前高叫「we miss you」及「come back Hong Kong」等口號，令到現場混亂，肥彭一度面容扭曲，認真狼狽，另外有人趁亂送上肥彭愛吃嘅蛋撻，肥彭太太一手代為接收，驚死蝕底。
同日民主阿婆以「香港2020」召集人身份，舉行記者會提出政改方案，認定只有提名委員會，冇提公民提名。隨後佢去城大政改論壇推銷其方案時，即遭學生圍攻，質疑佢背棄公民提名、係民主倒退。
鬼祟飯局密會 前後腳走
民主阿婆之後到咗灣仔駱克道一間中菜館等人食晚餐，原來係約咗肥彭兩公婆，佢哋突然約埋碰頭傾密偈，究竟所為何事呢？原本肥彭喺呢個政改諮詢敏感時候訪港已惹人聯想，嚟到香港仲同人稱「搞事四人幫」嘅民主阿婆食飯密會，話唔係密謀攪局都冇人信啦！肥彭尋晚差不多食到十點半鐘才離開，仲要同民主阿婆前後腳走，如果正常社交食飯或敍舊，又使乜咁鬼祟喎！
