政壇：搞搞政：鬍鬚曾被寸識靠嚇唔識開源
財爺鬍鬚曾早前喺財政預算案中作出警示，話香港七年後有機會步入結構性財赤後，畀外界狂轟佢一味「狼來了」靠嚇。尋日鬍鬚曾出席商界聯席午餐會時就幽自己一默，講到明成個午餐會唔再講日後係咪會有財赤，因為講來講去確有少少「阿媽係女人」。雖然佢成功博得台下一陣掌聲，但仍然被總商會主席周松崗暗寸佢孤寒，話與其一味嗌財赤，不如諗辦法開源好過啦！
話說中華廠商聯合會副會長吳永嘉喺午餐會問政府會否效法新加坡，對部分特別企業提出稅務寬免，以增強特定行業嘅競爭力呢？點知鬍鬚曾老實唔客氣，話香港稅制已經係全球最低，未來唔會有任何改變，仲話現時已有九成企業唔使交稅，如果對部分交稅企業作出稅務優惠，等同玩弄其他唔使交稅嘅企業喎。
此話一出，台下幾百人即刻靜晒，可能連鬍鬚曾都感覺到講大咗，惟有兜番話香港稅制愈簡單，其實愈容易吸引外資到香港，所以盡量會保持低稅率兼簡單稅制。
鬍鬚曾喺午餐會上強調政府已使咗好多錢，仲呼籲在場商界人士，應該聚焦預算案已增加大量經常性支出，唔好再着眼未來係咪財赤。點知擔任午餐會主持人嘅周松崗就暗寸鬍鬚曾「孤寒」，佢話個人經驗所得，每次叫老婆使少啲錢時，老婆往往會叫番佢諗吓點樣搵多啲錢。咁講法，即係叫鬍鬚曾唔好一味呻窮靠嚇，應該諗吓點樣開源，唔好白支人工。
