政壇：立會指示牌要倒轉嚟睇

立法會前日召開特別會議，討論有關第一標準薪級職系規定工作時數嘅問題，咁啱有市民就喺政府總部同立法會附近見到貼咗八張印有箭嘴嘅指示牌，教啲人點去立法會開會，但當中有五張嘅字體係上下倒轉嘅，只得三張係貼啱，而且貼得好求其，唔通立法會秘書處職員做嘢咁差？

有市民喺政府總部同立法會附近見到貼咗多張印有箭嘴嘅倒轉指示牌。（讀者提供）

（讀者提供）

不過，秘書處就話唔關佢哋事，強調啲指示牌唔係佢哋印製嘅。咁講法，可能有機會係公務員工會印出嚟方便啲公務員去開會喎，可惜指示牌個箭嘴就印晒向右，當行到要轉左時咪唔啱用囉，惟有將張指示牌上下倒轉嚟貼，搞啱箭嘴方向，但啲字就倒轉晒嘞，呢啲好明顯係做事唔夠細心。