政壇：栢志高夠鐘拍屁股鬆人
其中一名最資深嘅現職政務官應耀康，離開政府決策核心接近兩年後，終於等到機會「歸位」喇，而且仲係負責被特首梁振英視為重中之重嘅房屋政策，相信可以幫到現屆政府唔少。
政府尋日宣布，現職競爭事務委員會秘書長嘅應耀康，將於下月二日起接替即將退休嘅栢志高，出任運輸及房屋局常任秘書長（房屋）兼房屋署署長。現年五十三歲嘅應耀康，八三年加入政務職系，佢對內熟悉政策，對外應付立法會議員同傳媒亦有一手，因此早喺○三年十月、即超過十年前已升任保安局常秘，○七年十一月再轉任財經事務及庫務局常秘（庫務）。
應耀康「歸位」等到頸長
佢喺二○一二年七月因私人理由休假咗大半年，到佢想返回政府時，所有D8級嘅政策局常秘位都已經坐滿晒，惟有借調到新成立嘅競委會做住先，等咗大半年先等到栢志高退休空番個常秘位出嚟，令佢有機會「歸位」。
至於現年五十四歲、可能係特區政府最後一位外籍常秘嘅栢志高，新聞稿形容佢對香港嘅公私營房屋發展有好大貢獻，包括協助立法規管一手樓銷售手法、訂立新一套長遠房屋策略及建屋目標，以及參與推行各項樓市「辣招」等工作。
不過，對於栢志高喺○八年出任香港駐歐盟特派代表期間，涉嫌協助「貪曾」前特首曾蔭權爵士同意大利政要進行「魔鬼交易」，以求安排與當時嘅教宗本篤十六世私下會面嘅驚天國際醜聞，新聞稿就隻字不提。做公務員就有呢樣好囉，夠鐘退休拍吓屁股就可以走人，長俸退休金袋袋平安，唔需要政治問責！
